علق الإعلامي أدهم الكموني، على تشبيهه بالالإعلامية فريال صالح، بجانب حديثه عن أهمية جلوس الرجل مع أسرته في المنزل وإعطائهم من وقته، والكشفت عن أسرار حياته الشخصية وزيجاته.
وقال أدهم الكموني خلال حواره مع الفنانة انتصار وبدرية طلبة ونوليا، في برنامجهم “من غير نفسنة” المذاع عبر شاشة قناة “هي”: مرة كنا بنهزر زمان وأنا في الجامعة وكانت مرات هنيدي معايا في الجامعة، ولبسونا بواريك وعملوا ميك آب، ولبسوني باركة صفراء حقيرة أوي، واكتشفت إني النسخة المشوهة من فريال صالح، أنا شبها جدًا، وكان الموضوع بالنسبة ليا غريب ومكنتش واخد بالي.
وتابع أدهم الكموني: أحلى رجالة اللي بتقعد في البيت، ولازم الرجالة تخاف من مراتاتها، والست لما تبقى سعيدة في البيت مش هتنكد عليك وحياتك هتبقى سعيدة، ومش هتتجلط بدري ومش هيجيلك شلل، ولكن أنا مراتي رميت طوبتي خلاص وقالت مفيش أمل.
وأضاف أدهم الكموني: أنا اتجوزت كتير ولكن مراتي دي معايا بقالها 8 سنين، والراجل عمومًا بيحب التغيير، ولكن ممكن تغير وأنت متجوز مش لازم تطلق، بيبقى هرس كتير، والراجل بيحب بعينه، ولكن الست بتحب بودنها ولازم الراجل يدخل دماغها، وأنا قلبي كبير.
واستكمل: كل الرجالة نفس العجينة ولكن بيمسكوا نفسهم، وفي اللي منفجر على طول وده متخافيش منه، وأي راجل بيتفقص، والست أقوى جهاز مخابرات في العالم.
“من غير نفسنة” برنامج نسائي ساخر يقدمه كلا من الفنانة انتصار وبدرية طلبة ونوليا، يعرض يوميًا من السبت إلى الثلاثاء، ويقدم عددًا من القضايا الاجتماعية بطريقته الساخرة والخاصة من خلال استضافة عددًا من الشخصيات المؤثرة على السوشيال ميديا والمشاهير والفنانين لمعرفة آرائهم في تلك القضايا.
