علق الداعية معز مسعود لأول مرة بعد الأزمة الكبيرة التي بدأت بين زوجته حلا شيحا والفنان تامر حسني ، وذلك بعد كتابة الأولى بوست على صفحتها على إنستجرام تنتقد فيه الأخير وأنه لم يفي بوعده معها ، ولم يحذف المشاهد التي كانت لا تريدها والتي يوجد بها أحضان وخلافه في كليب بحبك من فيلم مش أنا والذي يجمعهما سويا ويعرض حاليا في السينمات .
ووجه معز مسعود رسالة دعم لزوجته حلا شيحا بعد الهجوم التي تتعرض له وكتب علي حسابه الرسمي على إنستجرام قائلا : ” إلى زوجتي الغالية حلا .. قادر افهم انزعاجك نتيجة مرور وقت كبير على تصوير الفيلم ده بسبب كورونا وان حياتك اتغيرت زي ما انتِ قولتي في البوست بكل احترام”.
وتابع كلامه : ” المشاهد دي و تجميعها رغم الوعد الشفهي بتجنب ذلك من صناع العمل (الكلام ماكانش عن إلغاء الكليب ولكن إن التركيز ميكونش على مشاهد معينة زي دلوقتي)، خصوصا مع نزول الكليب في توقيت له قدسية كبيرة بالنسبة لنا”.
وأضاف : “لو كنا نعرف ان الوعد مش كافي علشان يحل المشكلة دي كنا مشينا في حلول تانية.. اللي بينك وبين ربنا فيما يخص اجورك عن أعمالك السابقة مش مضطرة تقوليه لحد.. ومتشغليش بالك بأي كلام بيتقال بغير علم.. الناس مش بتاخد بالها من تفاصيل كتير أبسطها الوقت الطويل والأحداث الكبيرة اللي بتحصل في حياة اللي بيتكلموا عنهم بمنتهى الأريحية والثقة والتسرع في إصدار الأحكام”.
واستكمل كلامه : “قادر افهم قصدك لما اتكلمتي عن (نوع معيّن) من المشاهد يعني نوع معيّن من الفن و (مش تعميم على الفن كله) ، وعاوز أفكرك يا حبيبتي إن رحلتنا هي رحلة بحث عن الحق والخير والجمال.. رحلة اعتزاز بالثقافة والهوية.. نموذج قوي لرفض التطرف على الناحيتين.. الناحية المكسوفة من هويتها وبتقلّد الغرب من غير حكمة او علم او عزة (اللي انا سميته “الانتحار الثقافي” في كلمتي في الحوار الوطني سنة ٢٠١١) والناحية التانية المسجونة في قوالب مميتة للفكر والفنون.. كل ناحية منهم فاكرة انها معاها الحقيقة المطلقة وهيفضلوا يتخانقوا إلى يوم الدين.. لحد ما يظهر ناس عندهم الشجاعة والاعتزاز بثقافاتنا وهويتنا.. وبيحملوا هم أولادنا والأجيال الجاية.. وساعتها هيكون فنّنا بيعبر بجد عننا”.
وتابع : “الشجعان زيك بس هم الي بيمشوا الرحلة بصدق وإصرار لحد ما يوصلوا.. مهما كترت المحطات.. مهما كان الألم والحيرة واللخبطة.. مهما كان الهجوم والخذلان والمزايدات..مهما كان التمن الي بيتدفع ، الشجعان زيك بس هم الي بيراجعوا نفسهم وبيعترفوا بأخطائهم ويصلحوها.. ده غير إن المشهور رحلته بتكون تحت المجهر ، الشجعان زيك بس بيعيشوا بتلقائية واتساق مع النفس”.
واختتم كلامه قائلا : “فنوننا وثقافتنا وهويتنا يقدروا يتقابلوا.. انا بدأت أعمل ده في أعمالي الفنية وفيلمي (اشتباك) افتتح في مهرجان “كان” وفيلمي القادم رايح مهرجان “ڤينيسيا” قريب.. وهنقدر ناخد أنا وانتِ خطوات أكبر وأمثل على الطريق العظيم ده اللي هتعرف قيمته الاجيال الجاية.. وتاني بقولهالك يا حبيبتي..رحلتنا واحدة”.
وتشارك حلا شيحا مع تامر حسني في فيلم “مش أنا” ، والذي يعرض حاليا في السينمات وحقق إيرادات عالية ، وهو من بطولة تامر حسني ، حلا شيحا ، ماجد الكدواني ، سوسن بدر ، وعدد كبير من الفنانين ضيوف شرف الفيلم ، وتأليف تامر حسني ، ومن إخراج سارة توفيق.
