علقت الفنانة ايمان العاصي على الجدل الذي أثير مؤخرا حول منع المحجبات نزول بعض الشواطيء في الساحل الشمالي، وخاصة بعد فيديو سرب من إحدى القرى لرواد مسبح يتشاجرون معها إن المادة القماشية التي صنع منها المايوه غير ملائمة.
“احنا في الساحل الشمالي في بلومار القرية المملوكة لصاحب وادى دجلة ماجد سامي وهو مسيحي الديانة .. ولا كان يفرق معايا ديانته نهائي لكني مضطرة أقول كده لأن المكان خليط بين المسلمين والمسيحيين الوحدات ملخبطة متعرفش مين مسلم ومين مسيحي غير لو اضطلعت عالاسماء وطبعا المحجبات معروفين …الجنايني وبتوع الصيانة والأمن اسمهم جورج وعادل وجوزيف”؟.
وتابعت:”البنات بالبكيني عالبحر والشباب أحيانا بالبيرة واحنا بنكون في الشمسية اللي جنبهم لا هم بيستعروا مننا علي اساس ان احنا بقينا عار بالنسبة لبعض المرضي..ولا احنا متضايقين ابدا من وجودنا جنب بعض ..الناس لطيفة بشكل يفرح …
الراجل المسيحي باع الوحدات للمحجبات عادى ومفيش اي حمام سباحة ممنوع فيه النزول بالمايوه المقفول ابدا ..
مش بحب اسمي المايوه لا شرعي ولا بوركيني هو مايوه مقفول وخلاص “.”
وتابعت:”اللطيف بقي اني شفت ست منقبة قاعدة عالشط ام لبنات وأولاد فيه منهم محجبات وفيه منهم غير محجبات وجنبنا البنات بالبيكيني وحاجة في منتهي الرقي اللي في الدنيا … محدش بيبص علي حد اصلا .. لا بتعالي ولا باحتقار ولا بتلصص ولا بأي طريقة .. الناس مستمتعين بالبحر وحمامات السباحة مع أهلهم وأصحابهم ..بمناسبة الواقعة العجيبة اللي حصلت في مكان ما في الساحل مش متأكده من اسمه … ومش فارق معايا الأسماء المهم التصرفات التي تصدر من ناس بيقولوا علي نفسهم انهم شيك وكلاسي وكده”.
وأضافت:”ايه يا ناس ايه اللي جرالكو؟؟؟ وايه قصة انتي مستأجرة ولا مالكة دى ؟؟؟ ده الشاليه الصغير في الصف بتاع سيدى عبد الرحمن بيتأجر ب ٣٠٠٠ و٤٠٠٠ جنية في الليلة الواحدة وفي الفيلل بارقام خيالية هتدفع كل ده وتيجي تستخسر في المايوه اللي علي جتتها ما تظبطوا كده وانتو بتتكلموا وتحسنوا الملافظ والاخلاق عشان بقت بظرميط خالص ..الناس عاوزة تروح تتبسط يا هادمي اللذات يا عديمي المفهومية يا بتوع جر شكل مخاليق ربنا … تعالوا اتعلموا من الناس اللطيفة اللي احنا قاعدين في وسطهم .. ناس كُمًل وذوق .. والأهم انهم راقيين اصل الرقي له ناسه مش باللبس يا حبايبي لا بالأخلاق… تعرفوها الأخلاق دى ولا معدتش عليكم ؟؟؟ هي معدتش عليكم عارفين ليه لأن الأخلاق بتقول اننا نخلينا في حالنا ومنحشرش نفسنا في شؤون غيرنا ”
واختتمت منشورها:”يا بنات يا محجبات يا لطيفات يا جميلات يا قمرات يا مؤدبات يا راقيات معلش يا حبايبي الناس دول مش كتير هم شوية ناس مزعجين مش فاهمين … اعرضوا عن الجهلة يا حبايبي وادوهم ضهركم ومتردوش علي حد طالما انتو موجودين في مكان مسموح فيه المايوه المقفول يبقي اللي مش عاجبه يخبط راسه في اي حاجة عشان مفيش حيطان في شواطيء ربنا … بالنسبة للأماكن اللي بتمضي الناس علي الالتزام بعدم ارتداء مايوه مقفول هم مش كتير بناقصهم .. وطالما فيه محجبات ارتضوا ومضوا علي الروولز دى خلاص براحتهم وربنا يسعد سعيد بسعيدة … المهم انا مبسوطة بجيراني الحلوين المسيحيين والمسلمين غير المحجبات و المحجبات حيث مفيش فرق نهائي… تحية لكل الراقيين في بلومار وفي معظم شواطيء مصر وتحية لكل الناس الراقيين بشكل عام”.
