تصدرت صور جلسة تصوير الفنانة الكبيرة نادية الجندي محركات البحث ومواقع التواصل الإجتماعي بعدسة مصور المشاهير محمود رءوف ، والتي تم التقاطها خلال الأيام الماضية على البحر في مدينة العلمين .
وأكد “رءوف” أن كل الصور طبيعية ولا يوجد بها أي فوتوشوب أو تعديل ، لأن الفنانة نادية الجندي تهتم بصحتها بشكل جيد ولا تدخن ولا تشرب أي شئ من الكحوليات بشكل مستمر.
وقال محمود رءوف في بوست نشره على صفحته الرسمية على الفيس بوك عن الفنانة نادية الجندي : “عاوز أقولكم سر، من حكم شغلي مع النجمة نادية الجندي بقالي 4 سنين تقريباً ، في مرة سألتها، قلت لها إزاي البنت تقدر تحافظ على جمالها وسلامها النفسي، بحكم إنك أيقونة الجمال عند ناس كتير، ردت عليّا وقالت لي ع اللي هي بتعمله، عشان تحافظ بيه دايمًا على شبابها ،النجمة نادية الجندي، قالت لي ضروري المواظبة على الصلاة، وممارسة الرياضة وأن يكون الشخص مُحب للحياة طول الوقت، وهو ده سر جمال نجمة الجماهير”.
وتابع كلامه : “ممكن بعضكم يستغرب إن نادية الجندي بتصلي كل الفروض، وتقول للناس صلوا.. لكن والله أنا اكتشفت أنها شخصية طيبة جدًا وبتعمل خير كتير مش بتعلن عنه ، النجمة نادية الجندي، مش هي الوحيدة برضه اللي في الوسط الفني، أنا اكتشفت حاجات تانية برضه مع نجوم كتير برضه، على مدار الـ7 سنين اللي فاتوا من يوم ما دخلت الميديا”.
واختتم كلامه قائلا : “فيه نجوم بتكون حريصة على قراءة القرآن في كواليس التصوير وطول ما هم فاضيين، ومنهم بيواظب على الصلاة وكتير من يفعل الخير في صمت ، فيه ناس فاكرة إن الفنانين دول ميعرفوش ربنا، رغم أنهم بني آدمين زينا .. فبلاش نطلق أحكام على بعض من غير ما نعرف حقيقة الناس دي.. وربنا اللي عالم وبيحاسب في النهاية مش إحنا.. استقيموا يرحمكم الله”.
