تذكرت الفنانة شيماء سيف نصيحة النجمة الراحلة رجاء الجداوي لها، وحكت عن أول حديث دار بينهما، وتحول علاقتها بالفنانة الراحلة إلى صداقة .
وكتبت شيماء سيف عبر حسابها على انستجرام: “كانت صحبتى وحبيبتى وزى امى ربنا يعلم محبتك فقلبى من اول يوم اتقبلنا وكان تانى عمل ليا كنت صغيرة اول ماشوفتينى ضحكتى وقولتيلى انتى قلبك ابيض زى اميرة بنتى وبتفكرينى بيها وربنا هيكرمك فى شغلك وهتفتكرى كلامي”.
وتابعت “بس اهم نصيحة هقولهالك هى احترام المواعيد فى شغلنا ومن يومها وأنا ماشية بنصيحتك وبقينا اعز أصحاب ولما اشتغلنا سوا بعدها فعلا كانت احلى ايام كنت بروح اللوكيشن علشانك علشان افضل معاكى وتحكيلى كل زكرياتك ويوم فرحى عمرى ماهنسى نظرتك ليا وفرحتك بيا كانك امى بالظبط وزادت فرحتى لما جيتى سكنتى جنبى وبقيتى تصحى الصبح تقوليلي تعالى حالا نفطر سوا وحشاني انزل جرى اجيلك وعمرها ما كانت بترسى على فطار لا ده انا كنت بمشى من عندك اخر الليل من كتر ماكنتى مابتسبنيش امشى عشان قعدتنا حلوة وروحك حلوة انا بحبك اوى واوعدك عمرى ماهنساكى وهفضل ادعيلك لاخر يوم فعمرى”.
وأضافت”ربنا يرضى عنك ويثبتك عند السؤال ويجعل ألمك وخوفك في ميزان حسناتك.. اللهم لقنها حجتها واغفر لها وارحمها”.
